الكون حولينا مليان بالنجوم و المجرات و الاشياء الخطيرة بس صدقنى لو قلتلك
ان اخطر حاجة موجودة فى الكون على الاطلاق هى الثقوب السوداء !
كتير مننا بيسمع عن الكلمة دى و معرفتنا بيها بسيطة او منحصرة فى جملة
" الثقب الاسود بيبلع اى حاجة تقرب منه " بس للأسف مش عارفين نشأة
الثقوب السوداء بتبقى ازاى او كيفية عملها L عشان كدا حبيت أبدأ قسم الفلك فى المجلة بالموضوع دا
لأنه بيمثل لغز محير للعلماء خصوصا ان لحد اللحظة دى مفيش اى صورة واضحة للثقب
الأسود ضيف على كدا انه منطقة الواقعية فيه معّطلة و الزمن فيه منعدم و الجاذبية
فيه مطلقة ! باختصار : مكان مبينطبقش عليه اى قوانين الفيزياء المعروفة !
كيفية ميلاد الثقب الأسود :
طبعا عارفين ان الفضاء فيه ملايين و مليارات النجوم , و ان النجم بيبقى
عبارة عن مفاعل انصهارى نووى و لأن مبدأ الاتزان لازم يبقى موجود , فعندنا فى
النجم بيحصل تفاعلات بتنتج طاقة تطلع برا النجم , بيتم ضخها خارج النجم يعنى يبقى
كرد فعل لازم يبقى فيه قوة بتدخل لمركز النجم اللى هى " الجاذبية " .
تعالوا نفترض بقى ان عندنا نجم حجمه أكبر من الشمس بمائة ضعف , النجم دا
لشوية ملايين من السنين هيفضل فى صراع بين الطاقة الخارجة و قوة الجاذبية فى بينهم
اتزان لحد ما يبدأ النجم دا فى الاحتضار و ينتهى الوقود بتاع المفاعل اللى هو
" الغازات " الموجودة فى النجم على سبيل المجاز , و وقتها تبقى الغلبة
لقوة الجاذبية , و فى ثوانى صغيرة جدااا يبدأ النجم ينجذب ناحية المركز و يبدأ فى
الانضغاط بس بيكون محافظ على كتلته و ساعتها يبقى ميلاد ثقب أسود , ولأن ميلاد اى
طفل عندنا بيبقى مصحوب بصرخة طفل , فنفس الشىء ميلاد ثقب أسود بيبقى مصحوب بصرخة
بردو بس صرخة عبارة عن دفعتان من الطاقة كل دفعة فى اتجاه بيعبروا عن انفجار النجم
و اسم الدفعة الاكبر " انفجار اشعة غاما "و بتعتبر ثانى اكبر انفجار بعد
الانفجار العظيم و بتنطلق الاشعة دى بسرعة
الضوء و بتدمر اى حاجة فى طريقها , لدرجة ان لو حصل انفجار اشعة غاما قريب من
النظام الشمسى بتاعنا دا كفيل بأنه يدمر كوكب الأرض :O .
و من هنا بتنشأ الثقوب السوداء من النجوم المتحضرة اللى بتموت يعنى . و فى
الكون موجود بلايين الثقوب السوداء و العلماء بيتعرفوا عليها من خلال رصدهم
لانفجار اشعة غاما و فى الواقع ناسا بترصد كل يوم انفجار لاشعة غاما فى الفضاء .
طيب واحد يسأل و يقول ليه التعب دا
و يرصدوا اشغة غاما عشان يعرفوا ان فى
ثقوب سوداء , ما يرصدوا الثقوب السوداء نفسها ! . الحقيقة دا شىء صعب جدا جدا و دا
لان زى ما قلت الثقب الاسود الجاذبية فيه مطلقة يعنى اى حاجة بتقرب من مداره بيقوم
بابتلاعها من خلال الجاذبية حتى الضوء ! عشان كدا بيسموه الثقب " الأسود
" .
و عشان نوضح موضوع شفط الضوء دا نفرض ان احنا عندنا شلال و مجرى النهر و زورق
صغير . الزورق دا كل لما يكون بعيد عن حافة الشلال بيقدر يعوم او يسبح فى النهر عكس التيار , انما كل لما يقرب من حافة الشلال
يبقى التجديف صعب لحد ما يوصل لحافة الشلال و ساعتها يبقى التجديف عكس التيار
بعيدا عن الشلال مستحيل و يقع فى الشلال !
نفس الوضع هنقول ان الشلال دا هو الثقب الاسود و حافة الشلال هى حافة الثقب
الاسود , و النهر هو الجاذبية , اما الزورق دا فهو الضوء !
خطورة الثقب الأسود :
زى ما قلت ان الثقب الأسود ممكن يبلع اى حاجة تقرب من مداره بما فيهم الضوء
عشان كدا سموه اسود ! . الثقب الاسود عنده قدرة لابتلاع نجم , كوكب , نظام شمسى
كامل او حتى مجرة , لأن قوة جذبه مطلقة و كبيرة جدا ممكن توصل لملايين الاضعاف من
قوة جاذبية الشمس .
تخيلوا لو ثقب أسود مر من خلال نظامنا الشمسى اللى هيحصل ان بدل ما هيبقى
عندنا الشمس اللى فى توازن فى الجاذبية بينها و بين الكواكب و كل كوكب بيدور فى
مدار محدد , هيبقى عندنا جسم جاذبيته اكبر من اى حاجة تانية فهيختل نظام التوازن
لدرجة ان الكواكب هتبدأ تنهار جزيئاتها و تنصدم ببعض لحد ما تنهار و يبدأ بعدها
الثقب الاسود فى ابتلاعها . يعنى الثقب الاسود هيمر من خلال النظام الشمسى بتاعنا
وممكن يسيب وراه كل كوكب فى اتجاه و مدار ان ما متمش ابتلاع الكواكب دى ! ... بكلمات
بسيطة جدا : هيسيب وراه الدمار !
اما بقى لو الثقب الاسود قرب من كوكب الأرض فاللى هيحصل ان جاذبيته هتأثر
على الكويكبات الموجودة فى الفضاء و تبدأ الكويكبات دى تتوجه ناحية الأرض و تسقط
عليها و يبقى سطح الأرض عبارة عن جحيم و وقتها يبقى مرحبا بيكم فى واقع "
بداية النهاية " ! . يبدأ الثقب الاسود بشفط الغلاف الجوى للأرض و بعدها يشفط
الكوكب كله !. :/
فى مجرتنا اللى هى " درب التبانة " فى بالفعل ثقوب سوداء بس لو
بنشرح الكواكب للأطفال , سؤال مميز
بيسألوه " لو القمر بيدور حول الارض , و الأرض بتدور حول الشمس , يبقى الشمس
بتدور حول ايه ؟ "
السؤال دا مش الاطفال بس اللى بيسألوه بالعكس دا كان علامة استفهام لعلماء
كتير لحد ما تم استكشاف مركز المجرة باستخدام تليسكوبات وادوات رصد عملاقة و لمدة
حوالى 15 سنة , و لكن للأسف الخبر السىء هى ان مقدرناش نشوف مركز المجرة عبارة عن
ايه بسبب كثافة الغاز و النجوم الموجودة ! اما الخبر الكويس بالنسبة للرصد و السىء
بالنسبة للمستقبل هو ان من خلال تحليل حركة النجوم فى المنطقة دى العلماء اصبحوا
متأكدين تماما من وجود ثقب أسود عملاق فى مركز المجرة بيخلى كل حاجة فى المجرة
تدور حواليه بما فيهم الشمس !
طبعا الوقت نسبى خصوصا فيما يتعلق بالفضاء و بيبقى بالسنين الضوئية بمعنى
ان لو حصل افتراض ان ثقب اسود هيبتلع نجم مثلا ممكن الوقت اللازم للعملية دى يبقى
ملايين السنين الضوئية J .
كتابة : سعد لطفى
