دايما بيقولوا عن اليابانين انهم شعب مبدع و بيفكر خارج الصندوق و اكيد الوصف دا مجاش من فراغ !
الوكالة الفضائية اليابانية بتطور حاليا تكنولوجيا خاصة هدفها تنظيف الفضاء حول الارض من القمامة و متوقع اجراء اول اختبار للمنظومة دى فى شهر فبراير و متوقع بردو ان يتم اطلاق المنظومة للفضاء سنة 2019 ..
الوكالة الفضائية اليابانية وقعت اتفاقية تعاون مع شركة " نيتو سايمو كو " اليابانية و اللى متخصصة فى صنع شباك صيد السمك !
الشركة صنعت شبكة طولها كيلو متر واحد و المفترض انها هتجمع ما يزيد عن 100 مليون جزئية من القمامة اللى بتدور فى المدار حول الارض ..
الشبكة دى عبارة عن ألياف كهربية ديناميكية بتحتوى على الفولاذ المقاوم للصدأ و الالومنيوم , و المفترض ان القمر الصناعى اليابانى خلال الاختبار هيطلق جزء من الشبكة طوله 300 متر هيشكل حقل مغناطيسى يجذب القمامة و بعدها يجذبها مغناطيسيا لحد ما توصل للغلاف الجوى للأرض فتحترق و تتفتت !
الخبراء بيقولوا ان 100 مليون جزئية من القمامة و خاصة 22 الف قطعة ناتجة عن حطام الاقمار الصناعية و غيرها من الاهداف الفضائية و اللى بيزيد قطرها عن 10 سم بتشكل خطورة فعلا على محطة الفضاء الدولية و الاقمار الصناعية و حتى كمان على رواد الفضاء اللى بيخرجوا للفضاء المكشوف و اللى ممكن يموتوا نتيجة اصطدام بالقمامة الفضائية اللى بتدور حول الارض ..
المصدر :
روسيا اليوم .
بقلم : سعد لطفى
