تفتكرو لو حد اتبرع انو يديك كل يوم 86400 جنيه فى اليوم ..كل يوم من دا
طبعا هتفضل تفكر دا انا هعمل عمايل هشترى وهشترى وهشترى
هديكم مثال وانا صغيره مثلا كان نفسى اوى يكون عندى موبايل بكاميرا وكنت فاكره ان دى هى السعاده الكبرى وانى لما يجيلى الموبايل ينهار انا ممكن اقلب الدنيا !
بس لما جالى الموبايل فرحت بيه يوم او اقل وبس بقى عادى بقيت برميه فى اى حته اكسل اخده مش فارق معايا
ساعتها اكتشفت ان السعاده مش فلوس ..
ظهر من فتره بوستات ان تقدر تشترى السرير لكن مش تقدر تشترى النوم و ... الخ
نرجع لكلامنا تانى 86400 دول فيهم ميزه تقدر تشترى بيهم السعاده والامل والحب
تقدر تشترى بيهم كل حاجه تتخيلها
تقدر تشترى الحب لما تبوس والدك او والدتك الصبح قبل ما تنزل من البيت وهما يقابلوك بابتسامه ودعوه جميله جدا تمشيك باقى يومك
تقدر تشترى السعاده لما تلعب مع طفل صغير وتنبسط من حركاته اللى تجنن
تقدر تشترى الامل لما تلاقى لما تصلى لربنا وتحس بعد الصلاه ان فى باب هيتفتحلك قريب
تقدر تشترى التفوق لما تتعب وتذاكر وتستنى النجاح فى الاخر
كل الحاجات دى احنا بندفعلها ثوانى ودقايق من وقتنا مش فلوس
الفلوس مهمه لكن فى حاجات تانيه كتير بتخلى الدنيا احلى
احنا اتكلمنا عن المشتريات ...تعرف انك تقدر تبيع كمان
لما تبيع ابتسامه لواحد مضايق فلما يشوفك يضحك ...انت كده بعتله السعاده
لما تسيب شويه من وقتك علشان تكلم واحد مكتئب وشايف الدنيا سودا ويقتنع بكلامك ولو بنسبه قليله يبقى انت كدا بعتله الامل
وغيره وغيره
ايه دا هو الوقت حاجه حلوه اوى كدا ...جداااااااا فووووووق ما تتخيل والله
بس زى ما هو فيه حاجات حلوه كدا ...فى عكس الكلام اللى فوق دا
تقدر بكل سهوله تعكس الكلام اللى فوق :
زى مثلا انك تبيع للناس او لنفسك الكئابه بانك تنزل بوست كئيب
انت كدا قدامك حل من اتنين لاما هتنزل البوست ومحدش هيفرق معاه وبكدا انت خليت نفسك كئيب ..لاما واحد يكون عنده شويه امل ويشوف بوستك يكتئب وبكدا انت بعتله الكئابه ومش بقيت لوحدك كئيب
احذر ...انت تقدر بكلامك تخلى اللى حواليك مبسوطين وكمان تقدر تخليهم كئيبين
خليك إيجابى ...ابتسم حتى لو عندك مشاكل
ودايما خليك عارف انك شخص مهم جدا ...اوعى تقلل من نفسك
مش مهم الناس تقول عنك اي خليهم يتكلمو ...مجرد انهم يأذوك دا معناه انهم مهتمين بيك
ابتــــــــسم ...وصدقنى هتلاقى حياتك احلى بكتيييييييير اوى :)
بقلم : سمر صقر
