_ممكن لو سمحت تجيبلى العلاج اللى فى الروشتة ده ؟
_أوك تمام دقيقة واحدة .
الشريط الاول عبارة عن مضاد حيوى هتاخديه الصبح وبالليل ,
والتانى هتاخديه 3 مرات فى اليوم بعد الأكل .
_حضرتك الدوا حسابه كام ؟
_14 جنيه
_اتفضل .. متشكرة جداا .
_السلام عليكم ورحمة الله وبركاته.
_وعليكم السلام ورحمة الله وبركاته.
وهنا خرجت من الصيدلية مروحة ع البيت ,
واتعشيت واخدت الدوا .. بس طبعاا زى ما انتو عارفين
مفيش حاجة بتحصلى غير ما افكر واسأل عليها
اهووو بقا .. سموووووه بقى غلاسة , فوضول زيادة شوية .... أيااااا كان
قعدت افكر .. إيه أول مضاد حيوى فى العالم ؟ وازاى اكتشفوه ومين اللى اكتشفه ؟
وكيفيه عمله ؟؟
كل دى أسئلة داااااااارت فى دماغى حبيت اعرف اجابتها .
وقدرت اعرف ان البنسلين كان أول مضاد حيوى فى العالم
واللى اكتشفه واحد اسمه السير إلسكندر فيليمنج (1881 – 1955 )
وده اكتشفه بالصدفه وهو شغال على تجارب كيفية ايجاد أفضل الطرق لقتل البكتيريا
كان حاطط فى المعمل بتاعه طبق فى بكتيريا ومعاهم الفطر .
وعلى فكرة معمله ده معروف عنه قمة فى الفوضوى يعنى متقلقوش هيجى منكم
المهم راح اجازة ورجع منها فى سنة 1928
ولقى بالصدفة ان الطبق نمى عليه البكتيريا ماعدا المنطقة المحيطة بالفطر .
طبعاااا بدأ يفكر بشكل اعمق ويعرف اكتر ايه هو الفطر ده ..
وهو فطر البنسيليوم اللى بيستخرج منه البنسلين .
وعلى فكرة البنسلين لا يعمل إلا مع البكتيريا يعنى لو اخدته مع الامراض الفيروسية مش هيؤدى وظيفته .
وممكن الجسم يعانى حساسية ضد البنسلين ,, وللعلم مش البنسلين بس اللى ممكن اعانى منه حساسية
المفروض أى مضاد حيوى قبل ما اخده اتحقن بعينة صغيرة منه تحت الجلد عشان
اعرف فيه حساسية تجاهه ولا لأ ؟؟
ونجى بقى لجزئية .. كيف يعمل المضاد الحيوى ؟؟
المضاد الحيوى له كذاا طريقة عشان يهاجم البكتيريا
إما انه يحطم جداراها زى ما البنسلين بيعمل , أو بيعطل بناء البروتين لديها مثل التتراسايكلين .
الموضوع كبير بالنسبة للمضادات الحيوية والبنسلين بس انا حبيت اختصر على قد ما اقدر
ااااااااااااااه صحيح نسيت اقولكم انا جبت الدوا ليه ؟؟ طبعااااا انتوا مسألتوش
بس انا هعمل نفسى مش واخدة بالى وباكل فشار
بمناسبة اليومين اللى فاتوا والشتااا وكده .. جالى #برد
لكن الحمد لله بقيت كويسة
المصدر : ,1, 2 ,3 ,4
بقلم : شروق عوف .
